Khawsa amma ni cangnak a hamna thlangxing ak khan oeh tluknak hlue ak phasak huvoei aw?
Ave ak cam eng anik khan oeh Khawsa eng tluknak hlue ce anik khan oeh phasak soe ace a dawngoeh ak thawlh ce anik cangnak a hamna (2 Thesalonika 2:11)
Acoeh toe ikoe ti soe Khawsa eng thawlh anik cangnak a hamna tluknak hlue ce anik khan oeh ak phasak huvoei aw?Ace ce ammak thawlh aw?
Khawsa awi Baibul ve ni teng hoh amueihna Baibul ca khui oehkoe ak yoi mat doengca ni teok noeh ni poek oehtoe ni luna cingnoeh ni haana pang hlue hue. Ace a dawngoeh a konglam ni simnak a hamna toe ace Baibul awi na noer oeh ce ikoe konglam ya a teng hue ti ce na simnak a hamna a kung oehkoe eng cutnoeh na noer hamna awm hue. Acoeh ce ace Baibul eng a teng a konglam ce ya hlue sim huekte. Ace a dawngoeh ve a kong oeh awm ikoe ti soenum Khawsa eng tluknak hlue ce anik khan oeh a phasak ti ce simnak a hamna a kung oehkoe eng ni cutnoeh ni teok lah ve u.
2Thesalonika 2:8-9 khui oeh ak qoel ce Khrih ak oetkung(antichrist) a phalonak a konglam ce ni hu tha hue. Ak yoi 10 khui oehtoe Awitak ak khongkhi a konglam ce ni hu tha noeh, ak yoi 11 khui oehtoe ace mueihna awitak anik khong a dawngoeh tluknak hlue anik khan oeh phasak soe, acoeh ce ak thawlh anik cangnak hlue a konglam ce ni hu tha hue.
Poluh eng voeh koe awi a ti toe Khawsa eng awitak ak khongkhi ak khan oeh tluknak ak naana phasak hlue hue(v.10), acoeh ce ak thawlh, Khrih ak oetkung (antichrist)a konglam ce cangna hlue hue u. Khawsa eng Amoeh awitak ak cangnaakhi ak khan oeh awitak oehkoenng aning tluknak a hamna tluknak hlue ani tueih peekhi amni noeh, Amoeh awitak ak khongkhi ak khan oeh anik khongnak oeh thamah khyoer khyoer unoeh anik cangnak u thawlh a kung(antichrist) ce anik cangnak cek hamna tluknak hlue ce ani tueih peekhi ni.Khawsa eng anik khan oeh ani tueih peekhi hlan oeh aninak khong hohna a awmnak a dawngoeh Khawsa a tueih ce ak thawlh amni hue. Ani hamna awiceknak ce ak thuemna awm hue ikoe tinoeh num ni ti oehtoe “ awitak amcangna unoeh, thawlh oeh ce khue-uepnak ani taak a dawngoeh ni(v.12). Khawsa eng vemueihna ak tii nang kawih hue, “ qaiqoel moe saetnak num nanik tut hlue u? Oeih! Acoeh toe na ngah tut hlah! Na ngah poh hlah!(Ekklesia 11:9).
Ave ve Khawsa eng Amoeh awitak ak khongkhi, ak cehtaakhi ce ani ngah tawkna nawmnak anim lungko oeh ani paekkhina awm hue(Rom 1:24), chahnak ani phanak (Rom 1:26), ani awm ih kawpoek a saetnakkhi(rom 1:28) ce phasak hue. Ave mueihkhi ve Khawsa eng ani poh ani ngah tawkna poh hamna pohnak tha ani paekkhina awm hue. Khawsa eng ve thlang am lungko moe anik kawpoek aning ngahnakkhi boeih oeh ce thamahnak ni paekkhi soe ace thamahnak ak cam eng Amoeh Septakung ce khong hlue khyoer khyoer hue u. Ani ngahnak ang lak oeh ak doem, khawyah ce ni paekkhi kom soe toe ani hamna awiceknak ce khawyahna a awmnak a hamna ni. Khawsa eng ve a qaiqoel ak cangna moe thawlh ak suikhi boeih ce awicek hamna ni taak pekkhi hue.
