Khawsa eng Thlang A Xingnak Iyah Num A paek

Khawsa eng thlang  a xingnak kum ve 120 doenum xingnak a paek (Gen.6:3), acenak oeh ak doem ak xing hluetha num (Gen.11:10-32)?

Acoeh Boipa eng tinoeh, “ Kang Muemhla eng thlang ve ang rhuina amdoen hlue hue, ikoe tinoehnum niti oehtoe,ak thi thana ani awm a dawngoeh; a kho kum vetoe 120 ni(Gen.6:3).

Cenamoe Genesis khui oeh ni teok oehtoe Tuilii a lo khoenna thlang ve kum 120 ak choeina ak xing khawyah ni hutha hue.Ace ni poek oeh Khawsa awi eng thlang a kum ce 120 doeni a xing hlue hue a tice Baibul awi ak thawlh hlue mueihna awm hue. Ikoe tinoehnum ni ti oehtoe Khawsa awi eng kum 120 a tinak ak choeina thlang ak xing khawyah a awm a dawngoeh ni.

Thlangvang engtoe kum 120 ti ngahnak ce Tuilii a lonak hlue a kum a tingahnak ni ti hue u. Tuilii a lonak hlue kum ve ni nil man toe, Noah ce kum 500 a lo oeh Khawsa eng awi mtheh hue(Gen.5:32).Acoeh koeng Noah kum 600 a lo oeh Tuilii law hue(Gen.7:6). Khawsa eng awi am mthehnak moe Tuilii a lonak ang lak ce kum 100 doengni a lo hue, kum 120 amlaw hue.Genesis 5:32 ve Khawsa eng Noah lawng tuuk hamna a tipenak amni noeh, Noah ce capa pakthum a pa na a awmlonak ak qoelnak ni.Ace a dawngoeh kum 120 tive Noah a venna awi Tuilii a lonak hlue ak qoel penak amni hue tice ni hutha hue.Khawsa eng awi ak qoel a huna kum 120 nak oeh ak xing khawyah awm hue u.A coeh toe Khawsa awi eng thlang a xingnak ve kum 120 ni a lo hlue hue a tive ikoe a ti ngahnak aw?

Vemueihna Khawsa awi a awm hlan oehtoe Adam moe Evi oehkoe eng cutnoeh thlangxing ve a xinglu a nang sang noeh kum 900 ak choei doe doe ana xing  hue u.Ace hui oeh a xinglu anak toi soeihkhi toe Mahalalel 895 kum(Gen.5:17), Enok 365 kum(Gen.5:23)anih ce Khawsa eng a loh a dawngoeh ni, moe Lameh 777 kum(Gen.5:31), doena ana xing hue u.Khawsa awi eng thlangxing a kho kum ve kum 120 doeni a xing hlue hue tinoeh awi a pha lo khoen oehtoe Noah doengca ni kum 900 ak choeina ak xing hue.Ve ak kaa oehkoe kum 120 ak choeilam doena ak xingkhi ni teok lah ve u;

Noah   – 950 kum Genesis 9:28,29
Shem  – 600 kum Genesis 11:10-11
Arphaxad – 438 kum Genesis 11:12-13
Salah  – 433 kum Genesis 11:14-15
Eber    – 464 kum Genesis 11:16-17
Peleg  – 239 kum Genesis 11:18-19
Reu    – 239 kum  Genesis 11:20-21
Serug – 229 kum  Genesis 11:22-23
Nahor – 148 kum  Genesis 11:24-25
Terah – 205 kum  Genesis 11:32
Sarah – 127 kum  Genesis 23:1
Abraham – 175 kum Genesis 25:7

Ishmael   – 137 kum Genesis 25:17

Isaak       – 180 kum Genesis 35:28

Jakop      – 147 kum Genesis 47:28

Mosi        – 120 kum Deteronomy 34:7

Genesis khui oeh ikoe mueihnak awm thlang a xinglu a nang sang aw? Ikoe a ti oeh Noah oehkoe eng cutnoeh Tuilii a lo khoen oehtoe thlang a xinglu anak toi aw?Khawsa awi eng thlang a xingnak ve kum 120 doeni a xing hlue hue a tive, ngaih kuei ham ikoe awm amawm hue.Cenamoe Khawsa awi thlangxing a xingnak kum 120 doeni tinoeh a phalo khoen oehtoe, kum 120 ak choei ak xing thlang ve awm moesoenum joi hue. Ak choei oehkoe ni teok soe kum 120 ak choei ak xing ve thlang joi noeh thlangxing a kum ve Noah oehkoe eng ni teok soe Mosi doena a bet bet oeh a joilo ni hutha hue. A huna ce joi bet joi bet noeh Mosi ve a xinglu ak doem soeih matna awm law hue. Khawsa awi thlangxing a xinglu kum 120 tinoeh a phalo khoen oehkoeng thlang a xinglu ve a kutoet joina amjoi noeh a bet bet oeh joi bet bet hue tice ni hutha hue.

A huna Mosi eng, “ Ni xingkhui ve kum 70 lonoeh, sa a dip oehtoe kum 80 doe ni xingtha hue; cenamoe a tuem ce kawsaetnak moe khuikhatnak eng bae noeh nongvoei koel oeh rhaeng heu hue”(Sam 90:10) ana ti hue.Ace a dawngoeh tuh oeh thlangxing eng ni xingnak tuem ve a bet bet oeh joi noeh, kum 80 ak choei ak xing thlang awm moesoenum,kum 80 doe ak xing thlang joi hue. Khawsa awi eng ana tilo hoh a mueihna kum 70 a huma oeh ve thlangxing ak tuungna a xingnakna awm hue.

Ace a dawngoeh Khawsa awi eng kum 120 a ti ngahnak ce ak thaang toena thlangxing a kho kum ak toi amni noeh a bet bet oeh thlangxing a a xinglung ce kum 80 ak kaa doena toi bet bet hue tice ni hutha hue. Ace a dawngoeh Khawsa awi eng kum 120 a ti ce amthawlh hue.